នវានុវត្តន៍គឺជាកត្តាជំរុញដ៏សំខាន់មួយសម្រាប់ការបង្កើនផលិតភាព និងការរក្សានិរន្តរភាពកំណើនរយះពេលវែង។ ការគាំទ្រនវានុវត្តន៍នៅក្នុងសហគ្រាសធុនតូច និងមធ្យមអាចជំរុញកំណើនប្រកបដោយបរិយាប័ន្នតាមរយៈការបង្កើនផលិតភាព និងការកាត់បន្ថយគម្លាតប្រាក់ឈ្នួលរវាងសហគ្រាសធុនតូច និងមធ្យម និងក្រុមហ៊ុនធំៗ។ លើសពីនេះទៀត នវានុវត្តន៍នៅក្នុងផលិតផល និងដំណើរការអាចជួយបង្កើន ផលិតភាព តាមយៈការកាត់បន្ថយថ្លៃដើម និងការកែលម្អតម្លៃនៃផលិតផល និងបង្ហាញពីលទ្ធភាពរបស់ក្រុមហ៊ុននៅក្នុងការអនុវត្តនៃនវានុវត្តន៍។ ដូច្នេះក្រុមហ៊ុនដែលមាននវានុវត្តន៍តែងតែមានលទ្ធភាពក្នុងការបំពេញការងារបានល្អ ហើយជារឿយៗតែងតែអាចទប់ទល់នឹងផលប៉ះពាល់អវិជ្ជមានផ្សេងៗបានច្រើនជាងក្រុមហ៊ុនដែលមិនមាននវានុវត្តន៍។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បំពេញបេសកម្មជាសេនាធិការអោយរដ្ឋាភិបាលក្នុងដឹកនាំ និងគ្រប់គ្រងវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ។ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អាចគាំទ្រនវានុវត្តន៍ដល់សហគ្រាសធុនតូច និងមធ្យមដោយរៀបចំស្ថាប័នមួយប្រកបដោយប្រសិទ្ធភាព និង ក្របខណ្ឌគោលនយោបាយតាមរយៈការលើកកម្ពស់បរិយាកាសអាជីវកម្ម ជួយសហគ្រាសធុនតូច និងមធ្យម អភិវឌ្ឍ និងប្រើប្រាស់ធនធានផ្ទៃក្នុងជាយុទ្ធសាស្ត្រ ប្រកបដោយប្រសិទ្ធភាព បង្កើនលទ្ធភាពទទួលបានហិរញ្ញប្បទាន ដើម្បីពង្រឹងសមត្ថភាពនវានុវត្តន៍របស់ក្រុមហ៊ុននីមួយៗ កសាងប្រព័ន្ធនវានុវត្តន៍ដែលលើកកម្ពស់កិច្ចសហប្រតិបត្តិការ និងបណ្តាញរវាងក្រុមហ៊ុន សាកលវិទ្យាល័យ និងទីភ្នាក់ងាររដ្ឋាភិបាលដើម្បីទទួលបានផលប្រយោជន៍អោយគ្នាទៅវិញទៅមកជាអតិបរមា។
នៅពេលអ្នកវិនិយោគលើនវានុវត្តន៍ និងការអភិវឌ្ឍផលិតផលអ្នកនឹងឃើញពីអត្ថប្រយោជន៍ទាំងអស់នៃស្ថាប័ន ដែលជះឥទ្ធិពលដល់អ្នកគ្រប់គ្នាចាប់តាំងពីនាយកប្រតិបត្តិរហូតដល់ផ្នែកលក់ និងចាប់តាំងពីផ្នែកទីផ្សាររហូតដល់ផ្នែកសេវាកម្មអតិថិជន និងលើសពីនេះទៀត។ យើងនឹងជួយលោកអ្នកឱ្យមាននវានុវត្តន៍ និងកែប្រែអាជីវកម្មរបស់អ្នកតាមរយៈគំនិតថ្មីៗ។ នៅក្នុងផ្នែកនេះ លោកអ្នកអាចរកឃើញនូវគំនិតថ្មីៗ ភាពជោគជ័យ និងឧទាហរណ៍អំពីការលើកទឹកចិត្តរបស់សហគ្រិន។ នៅឆ្នាំ២០១៤ រាជរដ្ឋាភិបាលកម្ពុជាបានបង្កើតវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ក្រោមការគ្រប់គ្រងរបស់ក្រសួងប្រៃសណីយ៍ និងទូរគមនាគមន៍ (MPTC) ដើម្បីជំរុញដល់ការអភិវឌ្ឍន៍ ការស្រាវជ្រាវ និងបណ្ដុះបណ្ដាល វិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន (ICT) នៅក្នុងប្រទេសកម្ពុជា។ វិទ្យាស្ថាននេះទទួលបាន មូលនិធិសម្រាប់ការ ស្រាវជ្រាវចំនួន ៨លានដុល្លារ ក្រោមហិរញ្ញប្បទានបានមកពីចំណូលក្នុងវិស័យទូរគមនាគមន៍។
ឥទ្ធិពលនៃបច្ចេកវិទ្យាទៅលើការរស់នៅប្រចាំថ្ងៃរបស់យើង បានកើនឡើងយ៉ាងខ្លាំងក្នុងរយៈពេលមួយទសវត្សរ៍ចុងក្រោយនេះ។ មិនថាជាកុំព្យូទ័រយួរដៃ ថេប្លេត (Tablet) ឬទូរសព្ទដៃនោះទេ បច្ចេកវិទ្យាជួយយើងភ្ជាប់ទំនាក់ទំនងជាមួយពិភពលោក និងដើរតួជាកាតាលីករដ៏មានសក្តានុពលសម្រាប់ភាពរីកចម្រើន និងនវានុវត្តន៍នៅក្នុងអាជីវកម្មនានាទូទាំងពិភពលោក។ ទោះបីជាយ៉ាងណាក៏ដោយ សហគ្រិនថ្មីៗជាច្រើនមិនបានប្រើប្រាស់បច្ចេកវិទ្យាឱ្យអស់ពីសក្ដានុពលនោះទេ។ ឌីជីថលនីយកម្មសហគ្រាសធុនតូច និងមធ្យម គឺជាដំណើរការនៃការឈានឆ្ពោះទៅរកអាជីវកម្មឌីជីថល។ ជាទូទៅ អាជីវកម្មនេះសំដៅលើការប្រើប្រាស់បច្ចេកវិទ្យាឌីជីថលដើម្បីកែប្រែគំរូអាជីវកម្ម ផ្តល់នូវប្រាក់ចំណូលថ្មី និងឱកាសបង្កើន តម្លៃសាកល្បងជាមួយបច្ចេកវិទ្យាថ្មីៗ ព្រមទាំងចាប់យកទីផ្សារថ្មី និងប្លែកៗ។ ការជ្រើសរើសយកអាជីវកម្មឌីជីថលធ្វើឱ្យសហគ្រាសធុនមីក្រូ តូច និងមធ្យមមានសមត្ថភាពប្រកួតប្រជែងដោយការចំណាយត្រូវបានកាត់បន្ថយ ប្រាក់ចំណូលកើនឡើង និងការយល់ដឹងអំពីឥរិយាបថទីផ្សារ ក៏ដូចជាអ្នកប្រើប្រាស់កាន់តែល្អប្រសើរ។ តាមរយៈគេហទំព័រKhmerSME យើងខ្ញុំជឿជាក់ថា ដំណើរនៃការចាប់យកបច្ចេកវិទ្យាឌីជីថលនៅប្រទេស កម្ពុជា នឹងដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចប្រកបដោយបរិយាប័ន្ន និងស្ថេរភាពក្នុងប៉ុន្មានឆ្នាំខាងមុខ។ ហេតុដូច្នេះហើយ យើងខ្ញុំចង់ចែករំលែកនៅក្នុងដំណើរការនេះ ដោយចូលរួមផ្តល់ព័ត៌មានថ្មីៗបំផុតផ្សព្វផ្សាយពីឱកាសផ្សេងៗពាក់ព័ន្ធនឹងអាជីវកម្ម និងតំណភ្ជាប់ទៅកាន់ព្រឹត្តិការណ៍នានា។
ពាណិជ្ជកម្មតាមប្រព័ន្ធអេឡិចត្រូនិកកំពុងវិវឌ្ឍន៍យ៉ាងឆាប់រហ័ស ហើយអាជីវកម្មនានាកំពុងធ្វើការទាញយកផលប្រយោជន៍ចេញពីថ្នាលថ្មីទាំងនេះ។ ពាណិជ្ជកម្មប្រភេទនេះផ្តល់នូវគុណសម្បត្តិដែលពោរពេញទៅដោយសក្តានុពលជាច្រើនសម្រាប់អាជីវកម្ម ដូចជា ការកាត់បន្ថយថ្លៃដើម និងពេលវេលា បង្កើនការលក់ និងផលិតភាព ពង្រីកវិសាលភាពទីផ្សារ ព្រមទាំងបង្កើនការគាំទ្រពីអតិថិជន។ គុណសម្បត្តិទាំងនេះបានធ្វើឱ្យពាណិជ្ជកម្មតាមប្រព័ន្ធអេឡិចត្រូនិកមានភាពពេញនិយម និងរីកចម្រើនដ៏គួរឱ្យកត់សម្គាល់នៅក្នុងព្រះរាជាណាចក្រកម្ពុជា។ ប្រសិនបើលោកអ្នកជាម្ចាស់អាជីវកម្ម អ្នកគួរតែចង់ចាំអំពីនិតិវិធីដែលពាក់ព័ន្ធនឹងពាណិជ្ជកម្មតាមប្រព័ន្ធអេឡិចត្រូនិក ប្រសិនបើលោកអ្នកសម្រេចចិត្តលក់សេវាកម្ម ឬផលិតផលរបស់អ្នកតាមប្រព័ន្ធអេឡិចត្រូនិច (អនឡាញ)។ ភាពជឿជាក់ និងភាពស្មោះត្រង់របស់អ្នកប្រើប្រាស់ផលិតផល និងសេវាកម្មរបស់អ្នកគឺអាស្រ័យទៅលើថាតើអ្នកផ្តល់សេវាកម្មដល់គាត់ដោយរបៀបណា។ ក្រមប្រតិបត្តិអាជីវកម្មប្រព័ន្ធអេឡិចត្រូនិក អាស៊ាន (The ASEAN Online Business Code of Conduct) ត្រូវបានរៀបរៀងឡើងដើម្បីផ្តល់ការណែនាំដល់អាជីវកម្មអនឡាញអំពីរបៀបធ្វើអាជីវកម្មប្រកបដោយទំនួលខុសត្រូវ និងស្មើភាព ចំពោះអ្នកប្រើប្រាស់។ ការអនុវត្តក្រមនេះគីប្រព្រឹត្តទៅតាមគោលការណ៍ស្ម័គ្រចិត្តទាំងស្រុង។ រាជរដ្ឋាភិបាលកម្ពុជាមានមហិច្ឆិតាចូលរួមពង្រីកវិស័យពាណិជ្ជកម្មប្រព័ន្ធអេឡិចត្រូនិក តាមរយៈការវិនិយោគទៅលើការបង្កើតក្របខណ្ឌគតិយុត្តិ ការពង្រឹង ភស្តុភារកម្ម ហេដ្ឋារចនាសម្ព័ន្ធបច្ចេកវិទ្យាគមនាគមន៍ និងព័ត៌មាន និងពង្រឹងសមត្ថភាពសហគ្រាសធុនមីក្រូ តូច និងមធ្យម។ យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក យុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិកឆ្ពោះទៅរកការរីកចម្រើនប្រកបដោយនិរន្តភាពនៃពាណិជ្ជកម្មតាមប្រព័ន្ធអេឡិចត្រូនិក តាមរយៈការសម្របសម្រួលវិស័យសាធារណៈប្រកបដោយប្រសិទ្ធភាពក្នុងគោលបំណងពង្រឹងបរិយាកាសពាណិជ្ជកម្មតាមប្រព័ន្ធអេឡិចត្រូនិក និងតាមរយៈការអនុវត្តផែនការសកម្មភាពអោយបានគ្រប់ជ្រុងជ្រោយដើម្បីឆ្លើយតបទៅនឹងតម្រូវការជាក់ស្តែងនៃពាណិជ្ជកម្មតាមប្រព័ន្ធអេឡិចត្រូនិកនេះនៅក្នុងប្រទេសកម្ពុជា។ យុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិកដែលមានសមាសធាតុចំនួន១០ ដូចខាងក្រោម៖ ១. យុទ្ធសាស្ត្រគោលនយោបាយ និងផ្នែកសម្របសម្រួលស្ថាប័ន ២. ក្របខណ្ឌច្បាប់ និងបទប្បញ្ញត្តិ ៣. បទប្បញ្ញត្តិសម្រាប់សហគ្រាសធុនតូច និងមធ្យម ៤. ហេដ្ឋារចនាសម្ពន្ធបច្ចេកវិទ្យាព័ត៌មាន និងគមនាគមន៍ ៥. ហេដ្ឋារចនាសម្ពន្ធជំនាញឌីជីថល (អក្ខរកម្មឌីជីថល ជំនាញព័ត៌មានវិទ្យា និងសហគ្រិនភាពឌីជីថល) ៦. ប្រព័ន្ធទូទាត់តាមប្រព័ន្ធអេឡិចត្រូនិច ៧. ភស្តុភារពាណិជ្ជកម្មក្នុងស្រុក ៨. ពាណិជ្ជកម្មឆ្លងកាត់ព្រំដែន ៩. ការទទួលបានហិរញ្ញប្បទាន និង ១០. ព័ត៌មានពាណិជ្ជកម្ម និងការគាំទ្រទីផ្សារ។ គោលនយោបាយសំខាន់ៗផ្សេងទៀត ១. រាជរដ្ឋាភិបាលកម្ពុជាបានអនុម័តច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកនៅខែឧសភា ឆ្នាំ២០២០។ ច្បាប់នេះគឺជាការបោះជំហានទៅមុខមួយដ៏សំខាន់សម្រាប់កម្ពុជា ដោយសារច្បាប់នេះបានកំណត់ជា មូលដ្ឋានយ៉ាងច្បាស់លាស់សម្រាប់ការជម្រុញពាណិជ្ជកម្មតាមប្រព័ន្ធអេឡិចត្រូនិក។ ច្បាប់នេះក៏បានផ្ដល់នូវឱកាសកាន់តែច្រើនដល់សហគ្រាសធុនតូច និងមធ្យម ហើយជាមួយគ្នានេះដែរក៏ចូលរួមក្នុងការអភិវឌ្ឍសេដ្ឋកិច្ចឌីជីថលនៅកម្ពុជា។ ២. អនុក្រឹត្យលេខ ២៤៦ ស្តីពីហត្ថលេខាឌីជីថល មានគោលបំណងគ្រប់គ្រង និងជំរុញការប្រើប្រាស់ហត្ថលេខាឌីជីថលនៅព្រះរាជាណាចក្រកម្ពុជាប្រកបដោយសុវត្ថិភាព និងប្រសិទ្ធភាពខ្ពស់។
អ្នកកំពុងពិចារណាចាប់ផ្តើមជំនួញនៅកម្ពុជា តែខ្វះព័ត៌មាន? កុំសម្លឹងទៅណាឆ្ងាយ។ អ្នកនឹងទទួលបានព័ត៌មានដែលអ្នកចង់បានជាមួយការណែនាំពីជំនួញកម្ពុជា។ ចេះពីរបៀបបើកជំនួញនៅកម្ពុជា អាជ្ញាប័ណ្ណចាំបាច់មួយចំនួន ការគណនា និងការបង់ពន្ធ រហូតដល់របៀបបិទក្រុមហ៊ុននៅពេលអ្នកបញ្ចប់ជំនួញ។
អានបន្ត ឆែកមើលអ្នកផ្គត់ផ្គង់សេវាកម្ម
