គ្រាប់ធញ្ញជាតិ និងផ្លែឈើក្រៀមកម្ពុជាប្រមាណជាង ១២ តោនត្រូវបាននាំចេញជាផ្លូវការលើកដំបូងទៅកាន់ប្រទេសអូស្ត្រាលី ខណៈឯកអគ្គរាជទូតអូស្ត្រាលីប្រចាំនៅកម្ពុជាចាត់ទុកថាជាចំណែកដែលនឹងជួយគាំទ្រដល់ការសម្រេចគោលដៅរបស់ប្រទេសកម្ពុជាក្នុងការចាកចេញពីក្រុមប្រទេសអភិវឌ្ឍន៍តិចតួចនាពេលប៉ុន្មានឆ្នាំខាងមុខ។
ពិធីសម្ពោធការនាំចេញគ្រាប់ធញ្ញជាតិ និងផ្លែឈើក្រៀមកម្ពុជាទៅកាន់ប្រទេសអូស្រ្តាលី ត្រូវបានធ្វើឡើងក្នុងរាជធានីភ្នំពេញ កាលពីថ្ងៃទី១៤ ខែសីហា ដោយមានការចូលរួមពីតំណាងស្ថានទូតអូស្ត្រាលីប្រចាំប្រទេសកម្ពុជា ក្រសួងពាណិជ្ជកម្ម ក្រុមហ៊ុន RTT និងសហគ្រិនខ្មែរជាច្រើនទៀត។
សេចក្តីប្រកាសព័ត៌មានរួមរវាងក្រសួងពាណិជ្ជកម្ម និងស្ថានទូតអូស្រ្តាលី បានឱ្យដឹងថា កិច្ចព្រមព្រៀងនេះអាចសម្រេចទៅបានក្រោមកិច្ចគាំទ្រយ៉ាងខ្លាំងពីប្រទេសអូស្ត្រាលី តាមរយៈកម្មវិធីភាពជាដៃគូកម្ពុជា-អូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)។ CAPRED បានគាំទ្រក្រុមហ៊ុន Royal Trust Trading Co., Ltd. (RTT) និងអាជីវកម្មកសិកម្មផ្សេងទៀតរបស់កម្ពុជា តាមរយៈជំនួយបច្ចេកទេសបណ្តុះបណ្តាលលើការត្រៀមខ្លួនសម្រាប់ការនាំចេញ និងការផ្សារភ្ជាប់ក្រុមហ៊ុនទាំងនោះទៅបណ្ដាញទីផ្សារនានា។
យោងតាមសេចក្តីប្រកាសព័ត៌មាន ការនាំចេញគ្រាប់ធញ្ញជាតិ និងផ្លែឈើក្រៀមកម្ពុជា ទៅប្រទេសអូស្រ្តាលីលើកដំបូងនេះ មានបរិមាណជាង ១២ តោន ដែលរួមមាន គ្រាប់ស្វាយចន្ទី ស្វាយក្រៀម ខ្នុរក្រៀម ចេកក្រៀម និងត្រាវចំនិតក្រៀម។ ចំណែកការនាំចេញលើកទី ២ គឺត្រូវបានគ្រោងទុករួចជាស្រេច ដោយនឹងមានប្រភេទផលិតផលផ្សេងបន្ថែមទៀត និងបរិមាណច្រើនជាងមុន។
ឯកអគ្គរាជទូតអូស្ត្រាលីប្រចាំនៅកម្ពុជា លោក Derek Yip បាននិយាយថា អូស្ត្រាលីមានមោទនភាពក្នុងការធ្វើជាដៃគូជាមួយកម្ពុជា និងអាជីវកម្មរបស់កម្ពុជាដើម្បីជំរុញពាណិជ្ជកម្មឱ្យកាន់តែមានភាពប្រកួតប្រជែង និងឈានទៅទទួលបានទីផ្សារថ្មីៗ។ កិច្ចខិតខំប្រឹងប្រែងនេះនឹងជួយគាំទ្រដល់គោលដៅរបស់ប្រទេសកម្ពុជាក្នុងការចាកចេញពីក្រុមប្រទេសអភិវឌ្ឍន៍តិចតួចប្រកបដោយជោគជ័យ។
លោកបានបន្ថែមថា៖«កិច្ចខិតខំប្រឹងប្រែងទាំងនេះ ក៏នឹងជួយបង្កើននូវពាណិជ្ជកម្មទ្វេភាគីរវាងប្រទេសយើងទាំងពីរផងដែរ។ យើងប្តេជ្ញាចិត្តពង្រឹងភាពជាដៃគូសេដ្ឋកិច្ចរបស់យើងជាមួយកម្ពុជា និងគាំទ្រការធ្វើសមាហរណកម្មរបស់កម្ពុជាទៅក្នុងខ្សែចង្វាក់តម្លៃក្នុងតំបន់ និងពិភពលោក»។
លោកលើកឡើងទៀតថា ព្រឹត្តិការណ៍នេះ ក៏បានគូសបញ្ជាក់ពីការរីកចម្រើននៃកិច្ចសហប្រតិបត្តិការរវាងកម្ពុជា និងអូស្ត្រាលី ដើម្បីជំរុញលំហូរពាណិជ្ជកម្ម និងបង្កើនសមត្ថភាពប្រកួតប្រជែងនៃការនាំចេញរបស់កម្ពុជា។
សម្រាប់អត្ថបទទាំងស្រុង សូមអាននៅទីនេះ
ដោយ៖ ហ៊ឹន ពិសី
កាលបរិច្ឆេទបោះពុម្ភផ្សាយ៖ ថ្ងៃទី១៥ ខែសីហា ឆ្នាំ២០២៥
ព៍ត៌មាន៖ ភ្នំពេញ ប៉ុស្តិ៍
