អ្នកជំនាញសេដ្ឋកិច្ចបានអះអាងថា កម្ពុជានឹងទទួលបានផលវិជ្ជមានច្រើនបើអាចចូលជាសមាជិកនៃកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក (CPTPP) ដែលបច្ចុប្បន្នមានប្រទេសជាសមាជិកចំនួន ១២ និងមានទំហំសេដ្ឋកិច្ចប្រហែល ១៥% នៃផលិតផលក្នុងស្រុកសរុបរបស់ពិភពលោក។
គេហទំព័រ https://www.bilaterals.org កាលពីថ្ងៃទី១៥ ខែធ្នូ បានលើកឡើងថា មន្ត្រីមកពីប្រទេសជាសមាជិកនៃកិច្ចព្រមព្រៀង CPTPP បាននិយាយថា ប្រទេសកម្ពុជាបានដាក់ពាក្យសុំចូលជាសមាជិកនៃកិច្ចព្រមព្រៀង CPTPP។ ការពិភាក្សាអំពីការចូលជាសមាជិករបស់ប្រទេសកម្ពុជានឹងចាប់ផ្តើមនៅពេលសមាជិកទាំងអស់ផ្តល់ការយល់ព្រម និងបង្កើតក្រុមការងារមួយដើម្បីពិភាក្សាអំពីលក្ខខណ្ឌមួយចំនួន។
កិច្ចព្រមព្រៀង CPTPP គឺជាកិច្ចព្រមព្រៀងពាណិជ្ជកម្មសេរី ត្រូវបានចុះហត្ថលេខានៅថ្ងៃទី៨ ខែមីនា ឆ្នាំ ២០១៨ នៅទីក្រុងសាន់ទីយ៉ាហ្គោ ប្រទេសឈីលី ដែលមានប្រទេសជាសមាជិកដូចជា អូស្ត្រាលី ប្រ៊ុយណេ កាណាដា ឈីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និងវៀតណាម។ ចក្រភពអង់គ្លេសបានក្លាយជាសមាជិកទី១២ ក្នុងកិច្ចព្រមព្រៀងនេះកាលពីឆ្នាំ២០២៤។
អ្នកសេដ្ឋកិច្ចលោក ឡោ វិចិត្រ បានប្រាប់ភ្នំពេញប៉ុស្តិ៍ក្នុងថ្ងៃទី១៨ ខែធ្នូថា CPTPP គឺជាកិច្ចព្រមព្រៀងពាណិជ្ជកម្មធំមួយដែលមានប្រទេសជាសមាជិកចំនួន ១២ ហើយក្នុងចំណោមនោះក៏មានប្រទេសមួយចំនួនជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដូចកម្ពុជាដែរ។ លោកបន្តថា ការចូលជាសមាជិកនឹងជួយឱ្យកម្ពុជាទទួលបានផលវិជ្ជមានជាច្រើន។ លោកបន្តថា នេះអាចជាការធ្វើពិពិធកម្មពាណិជ្ជកម្មរយៈពេលមធ្យម និងវែងរបស់កម្ពុជា។
លោកបានថ្លែងថា៖«ជារួមការចង់ចូល CPTPP មានន័យថារដ្ឋាភិបាលកម្ពុជាមានគោលបំណងពង្រីកដៃគូពាណិជ្ជកម្មរបស់ខ្លួនឱ្យកាន់តែច្រើន ជាពិសេសបណ្តាប្រទេសនៅតំបន់អាមេរិកឡាទីន អាមេរិកខាងជើង និងចក្រភពអង់គ្លេស»។
ទោះយ៉ាងណា លោក វិចិត្រ និយាយថា នេះគ្រាន់តែជាការចាប់ផ្តើមប៉ុណ្ណោះ ដោយវាត្រូវឆ្លងកាត់ដំណាក់កាលជាច្រើនទៀតមុននឹងគេអាចអនុញ្ញាតឱ្យកម្ពុជាចូលជាសមាជិក។
សម្រាប់អត្ថបទទាំងស្រុង សូមអាននៅទីនេះ
ដោយ៖ ហ៊ឹន ពិសី
កាលបរិច្ឆេទបោះពុម្ភផ្សាយ៖ ថ្ងៃទី១៨ ខែធ្នូ ឆ្នាំ២០២៥
ព័ត៌មាន៖ ភ្នំពេញ ប៉ុស្តិ៍
