ប្រតិបត្តិការអាជីវកម្មរបស់បណ្តាក្រុមហ៊ុន/សហគ្រាសនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានបង្ហាញភាពវិជ្ជមានដ៏គួរឱ្យកត់សម្គាល់ ដោយក្នុងឆ្នាំ២០២៥ កន្លងមកការនាំចេញផលិតផលផលិតនៅក្នុង RGPPSEZ ទៅទីផ្សារអន្តរជាតិ មានទឹកប្រាក់សរុបជាង ២ ពាន់លានដុល្លារ កើនឡើង ១៤,០៩% បើធៀបនឹងឆ្នាំ២០២៤។
ការនាំចេញរបស់ RGPPSEZ តំណាងឱ្យប្រហែល ៧% នៃតម្លៃនាំចេញសរុបរបស់ប្រទេសកម្ពុជា។
សេចក្តីប្រកាសព័ត៌មានរបស់ RGPPSEZ ចេញផ្សាយកាលពីល្ងាចថ្ងៃទី១៥ ខែមករា ឱ្យដឹងថា ការនាំចេញពីកម្ពុជាទៅទីផ្សារអន្តរជាតិក្នុងរយៈពេលប្រមាណ ៥ឆ្នាំចុងក្រោយនេះ បានកត់ត្រានូវកំណើនមួយដ៏រឹងមាំ និងមានស្ថេរភាពកាន់តែប្រសើរ។ កំណើននេះបានឆ្លុះបញ្ចាំងពីការពង្រីកមូលដ្ឋានឧស្សាហកម្ម ការកែលម្អហេដ្ឋារចនាសម្ព័ន្ធ និងការធ្វើសមាហរណកម្មទំនិញផលិតនៅកម្ពុជាទៅក្នុងខ្សែ សង្វាក់ផ្គត់ផ្គង់ក្នុងតំបន់ និងពិភពលោក។
RGPPSEZ បានបន្ថែមថា ទោះស្ថិតក្នុងភាពមិនប្រាកដប្រជាជាសកល ក៏តម្លៃនាំចេញទំនិញរបស់កម្ពុជាបានកើនឡើងគួរឱ្យកត់សម្គាល់ ដោយឈានដល់ជាង ៣១ ពាន់លានដុល្លារនៅក្នុងឆ្នាំ២០២៥ បើធៀបទៅនឹងជាង ១៩ ពាន់លានដុល្លារនៅក្នុងឆ្នាំ២០២១។
សេចក្តីប្រកាសព័ត៌មានឱ្យដឹងទៀតថា ក្នុងនិន្នាការដ៏វិជ្ជមាននេះក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក [Royal Group Phnom Penh SEZ Plc.(PPSP)] ដែលជាអ្នកអភិវឌ្ឍន៍តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានរួមចំណែកយ៉ាងសំខាន់ដល់លទ្ធផលនៃការនាំចេញរបស់ប្រទេសកម្ពុជា។ គិតរហូតមកដល់ពេលនេះនៅក្នុង RGPPSEZ មានក្រុមហ៊ុន/សហគ្រាសចំនួន ៩១ មកពី ១៥ ប្រទេសដែលធ្វើប្រតិបត្តិការ។ ក្រុមហ៊ុនទាំងនេះគ្របដណ្តប់លើវិស័យសំខាន់ៗ រួមមាន គ្រឿងអេឡិចត្រូនិក គ្រឿងបង្គុំរថយន្ត សម្លៀកបំពាក់ ស្បែកជើង និងឧស្សាហកម្មធុនស្រាលផ្សេងៗទៀត។
សេចក្តីប្រកាសព័ត៌មានបញ្ជាក់ថា៖«ក្នុងឆ្នាំ២០២៥ ការនាំចេញពី RGPPSEZ បានឈានដល់ ២,១៤ ពាន់លានដុល្លារ ដែលតំណាងឱ្យ ៧% នៃតម្លៃនាំចេញសរុបរបស់ប្រទេសកម្ពុជា ដោយចំនួននេះគឺរក្សាកិត្តិនាមរបស់តំបន់យើងក្នុងនាមជាមជ្ឈមណ្ឌលឧស្សាហកម្ម និងនាំចេញឈានមុខគេមួយក្នុងប្រទេសកម្ពុជា»។
យោងតាម RGPPSEZ គិតត្រឹមខែធ្នូ ឆ្នាំ២០២៥ តំបន់សេដ្ឋកិច្ចពិសេសនេះ មានកម្មករកំពុងបម្រើការងារជាង ៥៥ ០០០ នាក់ដែលបានជួយគាំទ្រដល់ប្រាក់ចំណូលគ្រួសារ ការអភិវឌ្ឍជំនាញ និងកំណើន សេដ្ឋកិច្ចប្រកបដោយបរិយាប័ន្ន។
សម្រាប់អត្ថបទទាំងស្រុង សូមអាននៅទីនេះ
ដោយ៖ ហ៊ឹន ពិសី
កាលបរិច្ឆេទបោះពុម្ភផ្សាយ៖ ថ្ងៃទី១៦ ខែមករា ឆ្នាំ២០២៦
ព័ត៌មាន៖ ភ្នំពេញ ប៉ុស្តិ៍
