ភ្នំពេញ ថ្ងៃទី២៧ ខែសីហា ឆ្នាំ២០២៥ — ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំកម្មវិធីបណ្តុះបណ្តាលស្តីពីបញ្ញាសិប្បនិម្មិត (AI) សម្រាប់នវានុវត្តន៍សាធារណៈ នៅទីស្តីការក្រសួង ក្រោមអធិបតីភាព ឯកឧត្តមរដ្ឋមន្ត្រី ហែម វណ្ណឌី ដោយមានការចូលរួមដោយផ្ទាល់ និងតាមប្រព័ន្ធអនឡាញ ពីថ្នាក់ដឹកនាំ និងមន្ត្រីរាជការប្រមាណ ៤០០ នាក់។
កម្មវិធីនេះត្រូវបានរៀបចំឡើងដើម្បីពង្រឹងការយល់ដឹងអំពីគោលគំនិតជាមូលដ្ឋាន និងការប្រើប្រាសបច្ចេកវិទ្យា AI, បណ្តុះផ្នត់គំនិតសកម្មសម្រាប់ការប្រើប្រាស់ AI ក្នុងសេវាសាធារណៈ, និងបង្កើនការយល់ដឹងអំពីក្របខ័ណ្ឌក្រមសីលធម៌ ដើម្បីលើកកម្ពស់ការប្រើប្រាស់បច្ចេកវិទ្យានេះប្រកបដោយការទទួលខុសត្រូវ។
ថ្លែងក្នុងពិធីបើកកម្មវិធីបណ្តុះបណ្តាលនេះ ឯកឧត្តម ហែម វណ្ណឌី បានលើកឡើងថា៖ “ខណៈដែលបញ្ញាសិប្បនិម្មិតមានសមត្ថភាពកាន់តែខ្ពស់ក្នុងការបំពេញភារកិច្ចដដែលៗ ការវិភាគទិន្នន័យ និងការទាញយកព័ត៌មានសំខាន់ៗពីទិន្នន័យធំ កត្តាធនធានមនុស្សនៅតែមានតម្រូវការសម្រាប់ការវិនិច្ឆ័យ ជំរុញការច្នៃប្រឌិត និងនវានុវត្តន៍ ព្រមទាំងការសម្រេចចិត្តជាយុទ្ធសាស្ត្រ។ ដូច្នេះ ការរីកចម្រើន និងការរួមបញ្ចូលប្រកបដោយប្រសិទ្ធភាពនៃបញ្ញាសិប្បនិម្មិត ត្រូវតែស្របតាមអាទិភាព សមត្ថភាព និងគុណតម្លៃរបស់យើង ដើម្បីធានាថាបច្ចេកវិទ្យានេះបម្រើមនុស្ស និងពង្រឹងសមត្ថភាពរបស់យើង ក្នុងការសម្រេចបានវឌ្ឍនភាពប្រកបដោយអត្ថន័យ។”
ដោយ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
