ពាណិជ្ជកម្មទ្វេភាគីរវាងកម្ពុជា និងជប៉ុនបានកើនឡើង ២,១ ភាគរយដល់ ១៨១ លានដុល្លារក្នុងខែមករាឆ្នាំនេះ បើធៀបនឹងខែដូចគ្នាកាលពីឆ្នាំមុន។
តួលេខរបស់អង្គការពាណិជ្ជកម្មក្រៅប្រទេសជប៉ុន (JETRO) បានបង្ហាញថា កម្ពុជាបាននាំចេញទំនិញមានតម្លៃ ១៤២ លានដុល្លារទៅកាន់ប្រទេសអាស៊ីបូព៌ា កើនឡើង ១,៧ ភាគរយបើធៀបនឹងខែដូចគ្នាកាលពីឆ្នាំមុន។
កម្ពុជាបាននាំចូលទំនិញពីប្រទេសជប៉ុនដែលមានតម្លៃ ៣៩ លានដុល្លារ កើនឡើង ៣,៥ ភាគរយធៀបនឹងឆ្នាំមុន។
JETRO បានចុះបញ្ជីសម្លៀកបំពាក់ និងគ្រឿងបន្លាស់អគ្គិសនី និងអេឡិចត្រូនិច ជាការនាំចេញដ៏សំខាន់របស់កម្ពុជាទៅកាន់ប្រទេសជប៉ុន និងគ្រឿងម៉ាស៊ីន គ្រឿងអេឡិចត្រូនិច និងផលិតផលបច្ចេកវិទ្យា ដែលជាការនាំចូលសំខាន់។
ក្រសួងពាណិជ្ជកម្មកម្ពុជា បានបញ្ជាក់ថាចក្រកម្ពុជា មានគោលបំណងបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយដៃគូពាណិជ្ជកម្មសំខាន់ៗរបស់ខ្លួន រួមទាំងប្រទេសជប៉ុនផងដែរ។
កាលពីខែកុម្ភៈ ក្រសួងពាណិជ្ជកម្ម និងសមាគមជប៉ុន-កម្ពុជា បានពិភាក្សាគ្នាសិក្សាពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរី ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ និងលើកកម្ពស់បរិយាកាសធុរកិច្ចកាន់តែប្រសើរឡើង។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និយាយថា ប្រទេសជប៉ុនបានចូលរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ចរបស់កម្ពុជា តាមរយៈការស្តារឡើងវិញនូវហេដ្ឋារចនាសម្ព័ន្ធ ការផ្តល់កម្មវិធីអភិវឌ្ឍន៍ធនធានមនុស្ស ការពង្រឹងទំនាក់ទំនងសេដ្ឋកិច្ចក្នុងពាណិជ្ជកម្ម និងទេសចរណ៍ និងការវិនិយោគក្នុងវិស័យផ្សេងៗទៀត។
លោកបន្តថាវិនិយោគិនជប៉ុនក៏បាននាំយកលំហូរនៃបច្ចេកវិទ្យា ចំណេះដឹង និងជំនាញពីការវិនិយោគផ្ទាល់ពីប្រទេសជប៉ុន (FDI) និងជំនួយអភិវឌ្ឍន៍ផ្លូវការ(ODA) ផងដែរ។
លោក ប៉ែន សុវិជាតិ អ្នកនាំពាក្យក្រសួពាណិជ្ជកម្ម និយាយថា ក្រុមការងារមួយត្រូវបានបង្កើតឡើងដើម្បីពិភាក្សាទ្វេភាគីជាមួយភាគីជប៉ុនអំពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរី។
លោកបន្តថា៖ «ពាណិជ្ជកម្មទ្វេភាគីរវាងកម្ពុជា និងជប៉ុនបានបង្ហាញពីការរីកចម្រើនគួរឲ្យកត់សម្គាល់ ហើយកិច្ចសហប្រតិបត្តិការទ្វេភាគី ការទូត និងកិច្ចសហប្រតិបត្តិការផ្សេងទៀតគឺល្អ។ ទាំងនេះបង្កឲ្យមានភាពងាយស្រួលក្នុងការនាំមុខការពិភាក្សាអំពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរី»។
យោងតាម JETRO កាលពីឆ្នាំមុន ទំហំពាណិជ្ជកម្មទ្វេភាគីឈានដល់ ២,៣៣២ លានដុល្លារ។ កម្ពុជាបាននាំចេញទំនិញទៅប្រទេសជប៉ុនដែលមានតម្លៃ ១,៧៥២ លានដុល្លារកាលពីឆ្នាំមុន ដែលជាការកើនឡើង ៨,៤ ភាគរយធៀបនឹងឆ្នាំមុន៕
សម្រាប់អត្ថបទដើម សូមចូលទៅកាន់ដំណភ្ជាប់នេះ
ដោយ៖ ជា វណ្ណយុទ្ធ
ព័ត៌មាន៖ ខ្មែរថាមស៍
កាលបរិច្ឆេទបោះពុម្ភផ្សាយ៖ ថ្ងៃទី០៩ ខែមីនា ឆ្នាំ២០២២
