ក្រុមហ៊ុនផលិតរថយន្តអាមេរិក Ford បានសម្រេចចិត្តវិនិយោគក្នុងទំហំទឹកប្រាក់ ២១ លានដុល្លារនៅក្នុងខ្សែផលិតកម្មដំឡើង រថយន្ត Ford Ranger និង Ford Everest ។ ខ្សែផលិតកម្មដំឡើងនេះ កំពុងស្ថិតក្នុងការសាងសង់ ហើយនឹងចាប់ផ្តើមផលិតនៅខែមេសា។
រោងចក្រនេះ មានទីតាំងនៅតំបន់សេដ្ឋកិច្ចពិសេសក្រគរ ខេត្តពោធិ៍សាត់។
លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ព្រមទាំងជាប្រធានក្រុមការងាររាជរដ្ឋាភិបាលចុះជួយស្រុកក្រគរ និងស្រុកកណ្តៀង បានមានប្រសាសន៍ថា៖ «ជាមួយនឹងការវិនិយោគនេះ ក្រុមហ៊ុន Ford USA នឹងដំឡើងរថយន្ត Ford Pick-Up, Station Wagon ឬ រថយន្ត Ford SUV ហើយនឹងចាប់ផ្តើមផលិតកម្មរបស់ខ្លួន នៅខែមេសា មុនចូលឆ្នាំខ្មែរ»។
លោកបានបន្ថែមថា «ឥឡូវនេះយើងកំពុងព្យាយាមទាក់ទាញពួកគេ ឱ្យគៀគងដៃគូរបស់ពួកគេកាន់តែច្រើនទៀត ដើម្បីផលិតគ្រឿងបន្លាស់ នៅក្នុងទឹកដីនៃស្រុកក្រគរ ដែលជាផែនការមេរបស់ស្រុកក្រគរ ស្រុកកណ្តៀង ជាទូទៅ និងជាពិសេសសម្រាប់ខេត្តពោធិ៍សាត់ផ្ទាល់ ហើយយើងនឹងចាប់ផ្តើមបើកសម្ពោធ បន្ទាប់ពីស្ថានភាពជំងឺកូវីដ-១៩ បានធូរស្រាល។
រោងចក្រ Ford នេះកំពុងសាងសង់លើផ្ទៃដីជាង៤ហិកតា នៅភូមិសាវុន ឃុំស្នាអន្សា ស្រុកក្រគរ ខេត្តពោធិ៍សាត់ ដែលមានចម្ងាយ ១៥៩ គីឡូម៉ែត្រ ពីរាជធានីភ្នំពេញ។ រោងចក្រនេះនឹងផ្គុំ និងដំឡើងរថយន្ត Ford Ranger និង Ford Everest ដោយក្រុមហ៊ុន RMA AUTOMOTIVE (CAMBODIA) CO.,LTD ដោយវិនិយោគដំបូងនូវទំហំទឹកប្រាក់ចំនួន ២១ លានដុល្លារ។
ក្រុមហ៊ុនគ្រោងនឹងដំឡើងរថយន្តសរុបចំនួន ៤,៥០០ គ្រឿង ក្នុងឆ្នាំដំបូង ដើម្បីបំពេញតម្រូវការទីផ្សារតែក្នុងប្រទេសកម្ពុជា។
រោងចក្រនេះនឹងជួយបង្កើតការងាររហូតដល់ ៥០០កន្លែង សម្រាប់ខ្សែផលិតកម្ម។
សម្រាប់អត្ថបទដើម សូមចូលទៅកាន់តំណភ្ជាប់នេះ
ដោយៈ ខ្មែរថាមស៍
ព័ត៌មានៈ ខ្មែរថាមស៍
កាលបរិច្ចេទបោះពុម្ពផ្សាយ: ថ្ងែទី៩ ខែមករា ឆ្នាំ២០២២