ស្របពេលដែលរាជរដ្ឋាភិបាលកម្ពុជា កំពុងស្វែងរកអ្នក វិនិយោគិន មកវិនិយោគ លើវិស័យហេដ្ឋារចនាសម្ព័ន្ធដឹកជញ្ជូន ក្រុមហ៊ុនសាជីវកម្ម Samsung C & T Corporation បានបង្ហាញចំណាប់អារម្មណ៍ ចង់មកវិនិយោគ លើវិស័យនេះ ដោយសារមើលឃើញ សក្តានុពល និងឱកាសច្រើន។
ដើម្បីចូលរួមចំណែកអភិវឌ្ឍន៍វិស័យនេះ ឱ្យកាន់តែមានការរីកចម្រើន បន្ថែមទៀត កាលពីថ្ងៃទី២៤ ខែមករា ឆ្នាំ២០២២ នៅទីស្ដីការក្រសួង លោក ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានជួបពិភាក្សាការងារ ជាមួយគណៈប្រតិភូ ក្រុមហ៊ុនសាជីវកម្ម Samsung C & T Corporation ដឹកនាំដោយលោក Han Jung Suk តាមរយៈប្រព័ន្ធដេអូពីចម្ងាយ ដោយមានការចូលរួម ពីថ្នាក់ដឹកនាំ និងក្រុមការងារជំនាញពាក់ព័ន្ធ។
ថ្លែងក្នុងជំនួបនាឱកាសនោះ លោករដ្ឋលេខាធិការ បានជម្រាបជូន អំពីបច្ចុប្បន្នភាព នៃគម្រោងសម្រេចបាន គម្រោងកំពុងអនុវត្តបន្ត និងគម្រោងនាពេលអនាគត ទាក់ទងនឹងការអភិវឌ្ឍ ហេដ្ឋារចនាសម្ព័ន្ធផ្លូវ ស្ពាន កំពង់ផែ ផ្លូវដែក និងហេដ្ឋារចនាសម្ព័ន្ធ រូបវន្ត ជាច្រើនទៀត នៅកម្ពុជា។
ជាមួយគ្នានោះ លោករដ្ឋលេខាធិការ បានលើកឡើងថាៈ រាជរដ្ឋាភិបាលកម្ពុជា ស្វាគមន៍រាល់ការវិនិយោគ គ្រប់ប្រភេទទាំងអស់ ជាពិសេសការវិនិយោគ ក្នុងភាពជាដៃគូរដ្ឋ និងឯកជន (PPP) និងការវិនិយោគ ឈរលើគោលការណ៍ កសាង ប្រតិបត្តិ ផ្ទេរ (BOT) និងបានស្នើឱ្យក្រុមហ៊ុនសាជីវកម្ម Samsung C & T Corporation ពិនិត្យលទ្ធភាពវិនិយោគ លើការអភិវឌ្ឍ ផ្លូវល្បឿនលឿន មធ្យោបាយដឹកជញ្ជូនសាធារណៈ (Mass Transit) និងផ្លូវក្រវាត់ក្រុង រាជធានីភ្នំពេញ ព្រមទាំងកំពង់ផែជាដើម៕
សម្រាប់អត្ថបទដើម សូមចូលទៅកាន់តំណភ្ជាប់នេះ
ដោយៈ ខ្មែរថាមស៍
ព័ត៌មានៈ ខ្មែរថាមស៍
កាលបរិច្ចេទបោះពុម្ពផ្សាយៈ ថ្ងៃទី២៥ ខែមករា ឆ្នាំ២០២២
